BENNETT, NICHOLAS (1823 - 1899), cerddor a hanesydd

Ganwyd 8 Mai 1823 yng Nglanrafon, Trefeglwys, Sir Drefaldwyn. Cofnodir iddo gael ei fedyddio yn Llanfihangel, 8 Mehefin 1823. Cymerai ddiddordeb mewn casglu ac efrydu gweithiau hanesyddol, cerddoriaeth, a barddoniaeth. Cyfansoddodd ddwy gân, un i'r Cerddor a'r llall i Songs of the Four Nations.

Casglodd dros 700 o alawon Cymreig, a chyhoeddwyd 500 ohonynt mewn dwy gyfrol yn 1896, o dan yr enw Alawon fy Ngwlad , wedi eu dewis a'u trefnu gan D. Emlyn Evans; yn y llyfr ceir darluniau a bywgraffiadau o delynorion a chantorion gyda'r tannau, a nodiadau eglurhaol ar y dull o ganu gyda'r tannau. Gadawodd ar ei ôl draethawd ar arfbeisiau tywysogion Cymreig gyda darluniau ohonynt. Diogelwyd rhai llythyron o'i eiddo yn NLW MS 584B ; a gweler hefyd NLW MS 588C .

Bu farw 18 Awst 1899, a chladdwyd ef ym mynwent Llanfihangel Trefeglwys.

Awdur

• Robert David Griffith, (1877 - 1958)

Ffynonellau

• The late Nicholas Bennett, esq., of Glan-yr-afon, Bye-Gones, relating to Wales and the Border Counties, (August 1899), t.191
• The collections of the late Mr Nicholas Bennett, Bye-Gones, relating to Wales and the Border Counties, (September 1899), t.211
• In Memoriam: Mr. Nicholas Bennett, Y.H., Glanyrafon, Maeldwyn, Y Cerddor, Hydref 1899, t.116
• Mr Nicholas Bennett (Trefnant), Y Geninen, Mawrth 1900, tt.45-47
• Catalogue of Printed Literature in the Welsh Department, Cardiff Free Libraries (1898)
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)
• H. Blackwell, NLW MSS 9251-9277A: A Dictionary of Welsh Biography
• T. Morgan, Enwogion Cymreig 1700-1900 (1907)

Darllen Pellach

• Nicholas Bennett a D. Emlyn Evans, Alawon fy Ngwlad (1896)

Dolenni Ychwanegol

• Archifau LlGC: NLW MS 584B: Letters to Nicholas Bennett
• Archifau LlGC: NLW MS 588C: 'Celynog papers'
• Archifau LlGC: NLW MS 1213E: Nicholas Bennett: Alawon Cymreig
• Wikidata: Q20734018

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/