DAVIES, JOHN (1787 - 1855), saer maen a cherddor

Ganwyd yn y Banwen, Treforus, Morgannwg, 13 Tachwedd 1787. Cafodd fanteision addysg yn fachgen a daeth yn ysgolhaig da. Yn 14 oed dysgwyd ef i chwarae ar y dwlsimer gan ŵr o Lundain a letyai yn ei gartref. Saer maen ydoedd wrth ei alwedigaeth, a cherfiai ar gerrig beddau gyda'r nos ar ôl darfod ei ddiwrnod gwaith. Yn 24 oed priododd, ac adeiladodd dy iddo ei hunan yn Treboeth ger Abertawe, a galwodd y tŷ yn Godre Parc. Yn 30 oed dechreuodd astudio cerddoriaeth, a daeth yn gerddor lled dda. Cyfansoddodd lawer o anthemau a thonau. Yn Lleuad yr Oes am Mehefin 1827 ymddangosodd y dôn a geir yn ein casgliadau tonau dan yr enw ' Gethsemane ' 9-8, yr hon a drefnwyd yn 8 gan R. H. Pritchard, y Bala. Ceir tonau eraill o'i waith yn Haleliwia Drachefn, Llwybrau Moliant, a'r Caniedydd Cynulleidfaol; dengys ei donau ei fod yn meddu athrylith gerddorol. Bu farw 27 Ebrill 1855 yn Llanelli, a chladdwyd ef ym mynwent Mynydd-bach.

Awdur

• Robert David Griffith, (1877 - 1958)

Ffynonellau

• Cronicl y Cerddor, Mehefin 1883
• M. O. Jones, Bywgraffiaeth Cerddorion Cymreig (1890), Hydref 1890
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)

Dolenni Ychwanegol

• Wikidata: Q20733374

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/