DAVIES, WILLIAM (1785 - 1851), gweinidog Wesleaidd a chenhadwr

Enw: William Davies
Dyddiad geni: 1785
Dyddiad marw: 1851
Rhyw: Gwryw
Galwedigaeth: gweinidog Wesleaidd a chenhadwr
Maes gweithgaredd: Crefydd
Awdur: Griffith Thomas Roberts

Ganwyd 12 Hydref 1785 ger Llandyrnog. Ymunodd â'r seiat Wesleaidd wedi clywed Edward Jones, Bathafarn, yn 1800. Yn 1805, cyn bod yn llawn 20 oed, aeth yn weinidog i Fiwmares; o 1806 hyd 1813 gweinidogaethodd yn Sir Drefaldwyn a'r De, gan sefydlu achosion newydd lawer. Aeth i Lundain yn 1814, a chyn diwedd y flwyddyn gadawodd y wlad hon i fynd yn genhadwr (y cyntaf o'r Wesleaid Cymraeg) i Sierra Leone, lle y bu'n henadur, yn faer tref, ac yn ynad. Yn 1818 dychwelodd oddi yno oherwydd afiechyd, a bu'n gweinidogaethu ar gylchdaith Saesneg Penzance (1819-20) ac mewn amryw gylchdeithiau yng Nghymru hyd ei ymneilltuad yn 1841. Bu'n gadeirydd y dalaith Gymraeg (1821-6) ac yn ysgrifennydd talaith y De (1829-33). Cyhoeddodd ysgrifau lawer yn yr Eurgrawn Wesleyaidd ac amryw fân lyfrau, pregethau gan mwyaf, a'i ddyddiadur, pan ydoedd yn genhadwr yn Sierra Leone, heblaw cyfeithiadau o emynau Wesley. Effeithiodd yr afiechyd a gafodd yn Affrica ar ei feddwl, a chaed ef wedi ymgrogi ger ei gartref yng Nghydweli, 9 Chwefror 1851.

Awdur

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/

Mae'r Bywgraffiadur Cymreig yn cael ei ddarparu gan Lyfrgell Genedlaethol Cymru a Chanolfan Uwchefrydiau Cymreig a Cheltaidd Prifysgol Cymru. Mae ar gael am ddim ac nid yw'n derbyn cymorth grant. Byddai cyfraniad ariannol yn ein helpu i gynnal a gwella'r wefan er mwyn i ni fedru parhau i gydnabod Cymry sydd wedi gwneud cyfraniad nodedig i fywyd yng Nghymru a thu hwnt.

Ewch i'n tudalen codi arian am ragor o wybodaeth.