EVANS, DAVID (1744 - 1821), gweinidog y Bedyddwyr ym Maesyberllan.

Ganwyd ger Aberporth, Sir Aberteifi, mab David Evans, pysgotwr. Bu'n gwasnaethu ar amryw ffermydd o 1754 hyd 1774. Anaml yr âi i gapel cyn iddo ddechrau mynychu capel Hawen (A) yn 1767. Gwrthododd ymuno â'r Annibynwyr a'r Methodistiaid, a mynnodd ei fedyddio yng Nghilfowyr yn 1770, pan oedd yn hwsmon y Ddolgoch, Troedyraur, ac fe'i cymhellwyd i bregethu 'n union. Wedi priodi yn 1774, cymerth dyddyn gerllaw eglwys Troedyraur. Urddwyd ef a John Richards yng Nghastellnewydd Emlyn, 1778. Ymwelodd â'r Gogledd dair gwaith ar ddeg o dan nawdd cenhadaeth y Bedyddwyr. O 1787 hyd 1817 gofalai am Faesyberllan a'i changhennau. Cychwynnodd achosion yng Ngherrigcadarn ac Aberhonddu. Cododd ddau o'i feibion, John a David Davies Evans, gweinidog Pontrhydyrynn i bregethu. Bu farw 24 Hydref 1821.

Awdur

• Y Parchedig William Joseph Rhys, (1880 - 1967)

Ffynonellau

• Seren Gomer, 1841, 67
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 294-5

Dolenni Ychwanegol

• Wikidata: Q20732810

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/