EVANS, DAVID ('yr ail '; 1814 - 1847), gweinidog Wesleaidd

Ganwyd 2 Mehefin 1814 yn Abercegir. Wedi iddo fod yn bregethwr cyflogedig yn Aberystwyth, derbyniwyd ef i'r weinidogaeth yn 1835, a bu'n efrydydd yn Sefydliad Diwinyddol Hoxton (1836-8). Gweinidogaethodd ar gylchdeithiau Aberteifi (1838), yr Wyddgrug (1840), Manceinion (1841), a Llanidloes (1844). Yn ystod ei dymor yn Llanidloes, bu'n oruchwyliwr y llyfrfa (1844) ac yn golygu 'r Eurgrawn Wesleyaidd (1845-6).

Brwydrodd ag afiechyd am flynyddoedd; pallodd ei iechyd i ddechrau yn ystod ei dymor yn Hoxton, ac ar ddiwedd ei dymor ym Manceinion gorfu iddo ymneilltuo o'r weinidogaeth reolaidd am flwyddyn (1843), a thrachefn ar derfyn ei dymor yn Llanidloes (Awst 1847). Priododd Elizabeth Williams, Aberystwyth, yn 1841, a ganed iddynt fab a merch (David ac Annie Maria). Cyhoeddodd Duwdod Priodol ein Harglwydd Iesu Grist (1840) i wrthweithio dylanwadau Undodaidd ar Wesleaid Abertawe; cyhoeddwyd ei draethawd ar ' Pechod Gwreiddiol ' yn Eurgrawn 1855. Bu farw yn Aberystwyth 12 Medi 1847.

Awdur

• Y Parchedig Griffith Thomas Roberts, (1887 - 1977)

Ffynonellau

• Yr Eurgrawn Wesleyaidd, 1849, 289-93, 321,4; 1869, 509-10
• Hugh Jones, Hanes Wesleyaeth Gymreig (1911–3), ii, 840-3
• J. Jones, Y Bywgraffydd Wesleyaidd yn cynwys bras-hanes am un a thriugain o weinidogion Wesleyaidd Cymreig yn nghyda 35 o weinidogion a gwyr lleyg Saesonig (Machynlleth 1866), 85-6

Dolenni Ychwanegol

• Wikidata: Q20732812

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/