EVANS, WILLIAM (1838 - 1921), gweinidog gyda'r Methodistiaid Calfinaidd ac awdur

Ganwyd yn Betw, ger Tonyrefail, Sir Forgannwg, 1 Awst 1838, mab David Evans, Caerdydd, ac ŵyr i'r Parch. William Evans, Tonyrefail. Cafodd ei addysg yng Ngholeg Normal Abertawe a Phrifysgol Glasgow (M.A.), a bu wedi hynny yng Ngholeg Cheshunt am gwrs mewn diwinyddiaeth. Ordeiniwyd ef yn 1863 ac ymgymerodd â gofal eglwys Methodistiaid Calfinaidd Saesneg Runcorn. Ymhen dwy flynedd symudodd i S. Andrews, Pembroke Dock. Yn 1875 cafodd alwad i eglwys Saesneg Bath Street, Aberystwyth, lle y bu am chwe blynedd, pryd y galwyd ef yn ôl i Pembroke Dock, lle yr arhosodd hyd ymddiswyddo o'r fugeiliaeth yn 1905. Etholwyd ef yn llywydd cymdeithasfa'r De am y flwyddyn 1868, a bu'n ysgrifennydd trysorfa'r gweinidogion yn y De am 20 mlynedd. Bu farw yn ei gartref yn Pembroke Dock 11 Chwefror 1921. Ysgrifennodd Cofiant William Evans, Tonyrefail (Newport, 1892), An Outline of the History of Welsh Theology (London, 1900), The History of the South Pembrokeshire Calvinistic Methodist Churches (Wrecsam, 1913, gyda O. S. Symond), Souvenir of the Dawkins Family, Pembroke, 1916, Memoir of the Rev. William Powell, Pembroke (Cardiff, 1918).

Awdur

• Katharine Monica Davies

Ffynonellau

• Y Goleuad, 1921
• Who's who in Wales, 1920

Dolenni Ychwanegol

• Wikidata: Q20734612

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/