GWENT, RICHARD (bu farw 1543), archddiacon Llundain

mab i amaethwr o sir Fynwy. Etholwyd ef yn gymrawd o All Souls College, Rhydychen, yn 1515. Gwnaeth astudiaeth arbennig o'r gyfraith a daeth yn ddoethur yn y gyfraith eglwysig yn ogystal a'r gyfraith wladol. Ymarferodd fel cyfreithiwr eglwysig a dewiswyd ef i weithredu ar ran y frenhines Catherine yn 1529. Bu yn dal llawer bywoliaeth eglwysig gyda'i gilydd, ac ymddengys iddo gael ei benodi yn archddiacon Brycheiniog yn 1534. Gwasanaethodd fel dirprwywr i'r archesgob pan wnaeth Cranmer ei ymweliad archesgobol yn 1534. Bu'n llywydd ('Prolocutor') confocasiawn yn 1536, 1540 a 1541, ac yr oedd yn un o'r rhai a benodwyd i ymholi ynghylch cyfreithlondeb priodas Harri VIII ag Anne o Cleves. Yn ei Encomia cyfeiria Leland ato fel 'Richardus Ventanus juridicus' a chanmol ei rinweddau a'i addysg.

Awdur

• John James Jones, (1892 - 1957)

Ffynonellau

• Oxford Dictionary of National Biography
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Dolenni Ychwanegol

• Wikidata: Q7326125

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/