HICKS, HENRY (1837 - 1899), meddyg a daearegwr

Ganwyd 26 Mai 1837 yn Nhyddewi, Sir Benfro, mab Thomas Hicks, meddyg, ac Anne, merch William Griffiths, Caerfyrddin. Bu yn ysbyty Guy's, Llundain, yn paratoi ar gyfer bod yn feddyg a bu'n dilyn yr alwedigaeth honno yn Nhyddewi. Cyfarfu yno â J. W. Salter a oedd yn gweithio ar ffosylau ar ran y Geological Survey, a daeth i deimlo diddordeb mewn daeareg. Er iddo barhau gyda'i alwedigaeth, gan ddyfod maes o law yn bennaeth gwallgofdy preifat yn Hendon, cofir am Hicks ar gyfrif ei waith mewn daeareg. Bu'n ysgrifennydd y Geological Society, 1890-2, ac yn llywydd, 1896-8; cafodd fedal Bigsby y gymdeithas yn 1883. Etholwyd ei yn F.R.S. yn 1885. Heblaw ysgrifennu ar bynciau meddygol, yr oedd yn awdur dros 60 o bapurau ar bynciau daearegol yn delio, gan mwyaf, â'r creigiau hynaf yn ardal Tyddewi ac ucheldiroedd Sgotland, ogofâu Ffynnon Beuno a Cae Gwyn (Gogledd Cymru), lle y darganfuwyd hen esgyrn, ac â'r haenau a osodwyd i lawr yn ystod Oes y Rhew ac yn union wedi hynny. Yr oedd llawer o'i waith argraffedig yn delio â phethau yr oedd dadlau yn eu cylch; yr oedd ef yn ddadleuwr pybyr ond ystyriol. Priododd 1864, Mary, merch Arthur Richardson, ficer S. Dogwells, Sir Benfro. Bu farw 18 Tachwedd 1899.

Awdur

• Frederick John North, (1889 - 1968)

Ffynonellau

• Oxford Dictionary of National Biography, xxii
• Quarterly Journal of the Geological Society of London, 56, lviii-lix

Darllen Pellach

• Erthygl Wicipedia: Henry Hicks

Dolenni Ychwanegol

• VIAF: 73612272
• Wikidata: Q5722978

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/