HUGHES, HUGH PRICE (1847 - 1902), gweinidog Wesleaidd

mab John Hughes, llawfeddyg, Caerfyrddin, ac Anne ei wraig (ŵyres Samuel Levi Phillips); ganed yn y dref honno 8 Chwefror. O du ei fam perthynai i David Charles (I a II). Bu mewn ysgolion yng Nghaerfyrddin ac Abertawe, ac yna aeth i Goleg Richmond, Llundain. Graddiodd B.A. ym Mhrifysgol Llundain yn 1869, ac M.A. yn 1884. Yn Dover yr oedd ei ofalaeth gyntaf, ac ar ôl gweinidogaethu yn Brighton, Tottenham, Dulwich, a Rhydychen, daeth i Lundain yn 1884. Yn 1886 cychwynodd genhadaeth gorllewin Llundain, a'i pharhau hyd ddiwedd ei oes. Bu'n olygydd ar y Methodist Times, a chyhoeddi nifer o bamffledi crefyddol. Yn 1898 bu'n llywydd y gymanfa Fethodistaidd, ac yn ei flynyddoedd olaf cyfrifid ef yn un o arweinwyr bywyd crefyddol y wlad ac yn un o gynheiliaid cryfaf y gydwybod ymneilltuol. Priododd Mary Katherine Howard, merch y Parch. Alfred Barrett, o Goleg Richmond, a bu iddynt ddau fab a dwy ferch. Bu farw yn Llundain, 17 Tachwedd 1902.

Awdur

• Thomas Iorwerth Ellis, (1899 - 1970)

Ffynonellau

• Oxford Dictionary of National Biography
• The life of Hugh Price Hughes (Llundain 1902) (gan ei ferch)

Darllen Pellach

• Christopher Oldstone-Moore, Hugh Price Hughes: Founder of a New Methodism, Conscience of a New Nonconformity (University of Wales Press 1999)
• Erthygl Wicipedia: Hugh Price Hughes

Dolenni Ychwanegol

• VIAF: 23046533
• Wikidata: Q13583800

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/