Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

JONES , DAVID ( 1736 - 1810 ), clerigwr Methodistaidd ; g. 10 Gorffennaf 1736 , yn Aberceiliog , Llanllwni , sir Gaerfyrddin , mab Richard a Gwenllian Jones . Addysgwyd ef yn ysgol ramadeg Caerfyrddin . Ef, ond odid, yw'r ‘ David Jones of Llanvernach ’ a ordeiniwyd yn ddiacon gan esgob Tyddewi yn 1758 ; gwyddys ei fod yn gurad Tydweiliog , Llŷn , yn 1758-9 , a gwasnaethai yn Llanafan Fawr , Brycheiniog yn 1759-60 . Ordeiniwyd ef yn offeiriad yn 1760 , a cheir ef yn gurad Trefddyn a Caldicot , Mynwy , yr un flwyddyn. Aeth wedyn i ryw blwyf gerllaw Bryste , a symudodd i Crudwell , Wiltshire , yn 1764 . Daeth i gyswllt â'r arglwyddes Huntingdon yno, ac yn 1767 cafodd fywoliaeth Llan-gan , Morgannwg , gan yr arglwyddes Charlotte Edwin [q.v.] . Priododd, (1), Sinah Bowen , Gwaunifor (bu f. 1792 ), (2) Mrs. Bowen Parry , Maenorowen , sir Benfro . Rhannodd ei amser rhwng Morgannwg a Phenfro ar ôl ei ail briodas. Bu f. ym Maenorowen , 12 Awst 1810 . Dechreuodd gyfathrachu â'r Methodistiaid pan oedd ym Mynwy , a daeth yn ŵr blaenllaw yn eu plith ar ôl ymsefydlu yn Llan-gan . Bu Llan-gan yn gyrchfan poblogaidd gan Fethodistiaid Morgannwg ; heidient yno wrth y cannoedd i gymuno. Adeiladodd gapel i'w ddilynwyr ym mhlwyf Llangrallo , sef Salem , Pen-coed , yn 1771 . Yr oedd yn bregethwr melys iawn; yn ôl ‘ Pantycelyn ’ medrai doddi'r ‘ cerrig â'i ireidd-dra ’ a gwneuthur ‘ i'r derw mwyaf caled blygu'n ystwyth fel y brwyn .’ Dywedir ei fod yn erbyn mudiad yr ordeinio ymhlith y Methodistiaid , ond bu f. pan oeddid yn trefnu ar gyfer hynny. Cyhoeddodd ddau lyfryn: (a) Llythyr oddi wrth Dafydd ab Ioan y Pererin, at Ioan ab Gwilim ( Trefeca , 1784 ), a gynnwys gofiant byr i Christopher Bassett [q.v.] ,; (b) A Funeral Sermon … of the Late Countess Dowager of Huntingdon ( Llundain , 1791 ).

Llyfryddiaeth:

W. Williams , ;

, 1850 , 141-63;

E. Morgan , ;

D. E. Jenkins , , i, 188-9;

, i. 459-77;

, xx, 86, 96-100;

, N.L.W.

Awdur:

Atodiadau a chywiriadau:

JONES , DAVID ( Bywg. , 423-4) Ychwaneger yn y llyfr. Cylch. Cymd. Hanes M.C. , xlii, 12-21 (‘ Nodiadau ar David Jones, Llan-gan G.M. R. ).