JONES, ISHMAEL (1794 - 1876)

Ganwyd yn 1794 mewn tŷ to gwellt a elwid Plas-yn-pant, Ponciau, yn fab i Thomas ac Elisabeth Jones. Glöwr ydoedd yn nyddiau ei lencyndod, ond ar waethaf y creithiau glas a oedd ar ei wyneb, ni fynnai gydnabod ei alwedigaeth wreiddiol. Daeth o dan ddylanwad pregethu 'Williams o'r Wern,' ac yn fuan wedi ymaelodi gyda'r Annibynwyr dechreuodd bregethu. Bu yn athrofa Hackney cyn ei ordeinio i'r weinidogaeth. Gweinidogaeth symudol a fu ei eiddo gan na feddai'r gallu lleiaf i drin dynion. Dychwelodd i'w fro enedigol yn 1847 ac yno y treuliodd weddill ei ddyddiau. Bu farw 9 Medi 1876, a chladdwyd ef yn y Wern. Yr oedd yn bregethwr anghyffredin, a dywedid y medrai ar adegau fod mor rymus â Williams o'r Wern. Aeth yn enwog am ei ffraethineb a'i ddywediadau gwreiddiol.

Awdur

• Y Parchedig Brifathro Tom Ellis Jones, (1900 - 1975)

Ffynonellau

• Ishmael Jones, David Evans, Cofiant y Gwr Hynod sef y diweddar Barchedig Ishmael Jones (Bala 1877)
• Cymru (O.M.E.), ii, 3
• Y Tyst, 15 a 29 Medi a 13 a 20 Hydref 1876
• Y Traethodydd, Hydref 1926

Dolenni Ychwanegol

• Wikidata: Q20733294

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/