LEWIS, Syr ALFRED EDWARD (1868-1940), bancer;
g. yn Birmingham, 2 Awst 1868, mab y Parch. John Lewis, gweinidog eglwys Gymraeg y Methodistiaid Calfinaidd yn Wood Street. Cafodd ei addysg yn Ysgol Edward VI, ac aeth i wasanaeth y Bradford District Bank. Yn 1910 penodwyd ef yn rheolwr cyffredinol y banc hwnnw, a phan unwyd y banc â'r National Provincial Bank yn 1919 penodwyd ef yn gydreolwr cyffredinol y National Provincial Bank. Daeth yn brif reolwr cyffredinol yn 1922, yn un o'r cyfarwyddwyr yn 1929, ac yn ddirprwygadeirydd y banc yn 1934. Gwnaed ef yn farchog (K.B.E.) yn 1921, a chafodd radd doethur er anrhydedd gan Brifysgol Birmingham yn 1934. Cafodd radd LL.D. er anrhydedd gan Brifysgol Cymru, 1935. Yr oedd yn aelod o gyngor Coleg y Gogledd ac o gyngor Llyfrgell Genedlaethol Cymru. Priododd, 1896, Mary Roberts, Chapel Allerton, Leeds. Bu f. 21 Chwefror 1940. Brawd iddo oedd Hugh D. Lewis [q.v.].
Llyfryddiaeth:
- Gwybodaeth gan ei ferched;
- H. Withers, National Provincial Bank, 1833 to 1933, 1833-1933.
Awdur:
Edward Morgan Humphreys, O.B.E., M.A
