LLOYD, DAVID (1752 - 1838) clerigwr, bardd, a cherddor

Ganwyd 12 Mai 1752, yng Nghroes Cynon, Llanbister, sir Faesyfed, unig fab Thomas Lloyd, Trevodich, a Mary, merch David James, Croes Cynon Fach. Gweithiodd am beth amser ar dyddyn ei dad, a didrefn fu ei ddyddiau ysgol. Eto llwyddodd i ennill gwybodaeth o'r Lladin ac o fathemateg, a dysgodd Roeg ar ei ben ei hun. Yn y flwyddyn 1771 agorodd ysgol fechan yn Llanbister. Yno ymbaratodd ar gyfer urddau eglwysig. Bu'n gurad Putley, sir Henffordd, o 1785 hyd 1789, pan wnaethpwyd ef yn ficer Llanbister. Yno y bu hyd ei farw 3 Mawrth 1838. Yn y flwyddyn 1792 cyhoeddodd The Voyage of Life, sef cân yn null Edward Young. Ymddangosodd argraffiad newydd helaethach yn y flwyddyn 1812 o dan y teitl Characteristics of Men, Manners, and Sentiments, or The Voyage of Life, ac yn gyflwynedig i'r esgob Burgess. Cyhoeddodd hefyd waith o'r enw Horae Theologicae (Llundain, 1823), ac ymdeithgan o'r enw ' The Loyal Cambrian Volunteers,' yr unig un a gyhoeddwyd o'i amryw weithiau cerddorol. Yn ychwanegol at hyn yr oedd Lloyd yn beiriannydd medrus, a dywedir iddo ddyfeisio 'peiriannau o symudiad parhaol' ('perpetual motion engines').

Awdur

• John James Jones, (1892 - 1957)

Ffynonellau

• Oxford Dictionary of National Biography
• Robert Williams, Enwogion Cymru. A Biographical Dictionary of Eminent Welshmen (1852)
• Jonathan Williams ac Edwin Davies, A General History of the County of Radnor (Brycheiniog 1905), 1905

Dolenni Ychwanegol

• VIAF: 54020589
• Wikidata: Q18670989

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/