LLOYD, EVAN (1734 - 1776), clerigwr ac awdur

Ganwyd 15 Ebrill 1734, ail fab John Lloyd a Bridget Bevan, Fron Dderw, Bala. Cafodd ei addysg yn ysgol Rhuthyn a Choleg Iesu, Rhydychen (ymaelodi 22 Mawrth, 1750/1, B.A. 1754, M.A. 1757). Bu'n gurad S. Mary, Redriff, hyd 1763, pryd y daeth yn ficer segur Llanfair Dyffryn Clwyd. Bu farw'n ddibriod 26 Ionawr 1776; claddwyd ym meddrod ei deulu yn Llanycil. Cyhoeddodd amryw ddychangerddi ffraeth - The Powers of the Pen (London, 1766), The Curate (London, 1766), The Methodist (London, 1766; Conversation (London, 1767). Credid mai William Price, Rhiwlas, gerllaw'r Bala, oedd y ' Libidinoso ' a ddisgrifid yn The Methodist, a dug Price gyngaws am athrod yn erbyn yr awdur. Gorfodwyd Lloyd i dreulio pythefnos yng ngharchar y King's Bench, Llundain, a dirwywyd ef i'r swm o £50 ar 16 Mai 1768. Enillodd ffraethineb yr awdur gyfeillgarwch John Wilkes a David Garrick iddo; ysgrifennodd An Epistle to David Garrick (London, 1773). Gwawdiwyd Lloyd gan ' Scriblerius Flagellarius ' (William Kenrick ?) yn A Whipping for the Welsh Parson (London, 1773).

Awdur

• Cecil John Layton Price, (1915 - 1991)

Ffynonellau

• Cofrestr plwyf Llanycil
• Cardiff Manuscript 3. 18 (33)
• Foster, Alumni Oxonienses: the members of the University of Oxford, 1715-1886
• The Gazetteer and London New Daily Advertiser, 18 Mai 1768
• NLW MS 9664B, NLW MS 12294D
• Oxford Dictionary of National Biography
• Y Cymmrodor, xxix
• Cylchgrawn Llyfrgell Genedlaethol Cymru, viii, 264-305, 426-48 (ei lythyrau anghyhoeddedig)

Dolenni Ychwanegol

• VIAF: 748093
• Wikidata: Q5415462

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/