LLOYD, WILLIAM (1771 - 1841), clerigwr Methodistaidd

Ganwyd yn 1771, mab Robert ac Elinor Lloyd, Penmaes, Nefyn, Sir Gaernarfon. Addysgwyd ef yn ysgol ramadeg Botwnnog, a Choleg Iesu, Rhydychen. Ordeiniwyd ef yn 1801, a thrwyddedwyd i Roscolyn, Llanfair yn Neubwll, a Llanfihangel, Môn Ymunodd yn ebrwydd â'r Methodistiaid. Bu'n byw am ysbaid yng Nghaernarfon a Nefyn; cadwai ysgol wedyn ym Mrynaerau, ger Clynnog, a symudodd i gadw ysgol yng Nghaernarfon yn 1817. Treuliodd weddill ei oes yno yn fawr ei ddylanwad ymhlith Methodistiaid y Gogledd. Nid oedd yn bregethwr mawr, ond yr oedd yn ŵr duwiol. Yr oedd yn un o'r ychydig glerigwyr o'r Eglwys Sefydledig (tri yn unig yn y Gogledd) a lynodd wrth y Methodistiaid wedi ordeiniad 1811. Bu farw 16 Ebrill 1841, a chladdwyd ym mynwent Llanbeblig.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Drysorfa, 1844, passim;
• J. Morgan Jones a W. Morgan, Y Tadau Methodistaidd (1895-1897), ii, 315-21

Dolenni Ychwanegol

• Wikidata: Q8014634

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/