Y Bywgraffiadur Cymreig


A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z



LLWYD , ANGHARAD ( 1780 - 1866 ), hynafiaethydd

Ganwyd 15 Ebrill 1780 yng Nghaerwys , sir y Fflint , merch John Lloyd , rheithor Caerwys .

Yr oedd Angharad Llwyd yn aelod o (ail) Gymdeithas Cymmrodorion Llundain , a derbyniodd lawer o fedalau aur ac arian mewn eisteddfodau am ei thraethodau . Yn eisteddfod y Trallwng , 1824 , cafodd yr ail wobr am ‘ Catalogue of Welsh Manuscripts, etc., in North Wales ’; dau draethawd arall o'i heiddo oedd ‘ Genealogy and Antiquities of Wales ’ a ‘ The Castles of Flintshire .’ Golygodd a chyhoeddodd argraffiad o History of the Gwydir Family ( Syr John Wynn ). Ei phrif waith cyhoeddedig oedd History of the Island of Mona ; derbyniasai hwn y brif wobr yn eisteddfod Biwmares , 1832 .

Treuliodd gyfran helaeth o'i hoes yn copïo llawysgrifau mewn llyfrgelloedd preifat trwy'r wlad ; ceir syniad am faint ei diwydrwydd yn copïo ac am swm ei chyfraniadau hi ei hun os edrychir ar y llu llawysgrifau o'i heiddo sydd yng nghasgliadau Kinmel , etc., yn Llyfrgell Genedlaethol Cymru . Bu f. 16 Hydref 1866 yn Ty'n y Rhyl .

Ffynonellau:

  • Notable Welshmen (1700–1900) (1908) ;
  • 'Dictionary of Welsh Biography.' 27 cyf., N.L.W. MSS. 9251–77 ;
  • T. Pennant , A Tour (Tours) in [North] Wales , I, vi-vii;
  • Trafodion Anrhydeddus Gymdeithas y Cymmrodorion , 1828 , 36-58;
  • NLW MSS 781, 1551 - 1616 ;
  • Archaeologia Cambrensis , 1867 , 69;
  • Cofrestr plwyf Caerwys;
  • Mary Ellis, Flintshire Historical Society publications , Cyf 26 a 27.

Awdur:

Y Parchedig Ganon Evan Gilbert Wright, M.A., B.D., (1903-1993/4), Bangor

Blwyddyn Cyhoeddi: 1953-54