Y Bywgraffiadur Cymreig


A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z



MEADOWS , JOSEPH KENNY ( 1790 - 1874 ), darluniwr ;

bedyddiwyd 1 Tachwedd 1790 yn eglwys S. Mair , Aberteifi , ail fab James Meadows (hen swyddog yn y llynges ). Ni wyddys ddim o'i hanes hyd y flwyddyn 1823 , pryd y ceir ef yn gyfrifol am rai o'r darluniau yn The Mirror of the Stage a'r lluniau ar garreg (‘ lithographs ’) yng ngwaith Planché , Costume of Shakespere's Historical Tragedy of King John . Daeth i amlygrwydd mawr gyda The Heads of the People or Portraits of the English , 1838-40 , gwaith y cyfrannodd W. M. Thackeray iddo. Cyhoeddodd argraffiad darluniadol o weithiau Shakespeare , 1839-43 , a bu hefyd yn gwneuthur darluniau ar gyfer rhai o rifynnau Nadolig yr Illustrated London News . Priododd ferch John Henning , cerflunydd . Yr oedd yn gyfeillgar â phrif awduron ei gyfnod. Bu f. 19 Awst 1874 .

Ffynonellau:

  • Cofrestri plwyf S. Mair, Aberteifi;
  • Oxford Dictionary of National Biography ;
  • catalog rhif 139 Ifan Kyrle Fletcher;
  • G. N. Ray , gol., The Letters and Private Papers of William Makepeace Thackeray. Collected and edited by Gordon N. Ray , Llundain, 1945 (Llundain, 1945 ), i, 426.

Awdur:

Cecil John Layton Price, Ph.D. (1915-91), Aberystwyth / Abertawe

Blwyddyn Cyhoeddi: 1953-54