Y Bywgraffiadur Cymreig


A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z



MORGAN HEN ab OWEN (bu f. 975 ) brenin Morgannwg ;

ŵyr Hywel ap Rhys , sylfaenydd llinach newydd yng ngorllewin Morgannwg tua diwedd y 9fed g. Yr oedd Morgan , a ddilynodd ei dad Owain c. 930 , yn agos ei gyswllt â pholisi cyfeillgarwch â'r frenhiniaeth Sacsonaidd , a ddilynwyd gan Hywel Dda [q.v.] , a pharhaodd ar delerau da â'r Saeson am ychydig flynyddoedd o leiaf wedi marw Hywel . Yn ei ddyddiau ef yr oedd Morgannwg yn cynnwys Gwent unwaith yn rhagor ( gw. Morgan Mwynfawr ), er darfod colli rhai tiroedd ar y gorllewin a aeth yn eiddo i Ddyfed . Bu farw mewn oedran teg, a phasiodd ei frenhiniaeth i'w ddisgynyddion hyd nes y cymerwyd Morgannwg gan Gruffydd ap Llywelyn [q.v.] oddi ar Meurig , ei or-or-ŵyr.

Ffynonellau:

  • A History of Wales: from the Earliest Times to the Edwardian Conquest ;
  • Liber Landavensis. The Text of the Book of Llan Dâv , 1893 .

Awdur:

Yr Athro Thomas Jones Pierce, M.A., F.S.A., (1905-1964), Aberystwyth

Blwyddyn Cyhoeddi: 1953-54