PARRY, DAVID (1760-1821), gweinidog gyda'r Methodistiaid Calfinaidd;
g. 13 Chwefror 1760 yn Llwyndiriad, Caeo, sir Gaerfyrddin, mab Dafydd Parry. Ymunodd â'r Methodistiaid yn ieuanc a dechreuodd bregethu yn 1778. Bu'n efrydydd am dymor byr yn Nhrefeca. Priododd â Margaret Evans, Llofft-wen, Llanwrtyd, yn 1784, a symudodd i fyw i'r Gilfach, Llanwrtyd, c. 1797-8. Yr oedd yn un o'r fintai a neilltuwyd yn ordeiniad cyntaf y Methodistiaid yn Llandeilo Fawr, 1811. Yr oedd yn bregethwr nodedig iawn a gwasnaethai'n aml yn y sasiynau. Bu f. 27 Ebrill 1821, a chladdwyd ef y tu mewn i gapel Rhydybere.
Llyfryddiaeth:
- Drys., 1834, 65;
- Y Cylchgrawn, 1884, 86;
- Hanes Meth. Cymru, iii, 335;
- Joseph Evans, Biog. Dict., 234;
- J.M. Jones, Ordeiniad 1811, 147.
Awdur:
Y Parch. Gomer Morgan Roberts, M.A., (1904-93), Pont-rhyd-y-fen / Llandudoch / Llandybïe
