PARRY, WILLIAM (c.1742-1791), peintiwr portreadau;
mab John Parry, ‘y telynor dall’ [q.v.]. Yn ôl pob tebyg g. ef yn Llundain wedi i'w dad symud yno o Riwabon, ac astudiodd yn ysgol arlunio Shipley, yn oriel dug Richmond, a'r academi yn St. Martin's Lane, cyn dyfod yn ddisgybl i Syr Joshua Reynolds. Enillodd amryw o wobrwyon Cymdeithas y Celfyddydau, ac etholwyd ef yn aelod o Gymdeithas Unedig yr Artistiaid. Wedi treulio peth amser yn peintio ger Rhiwabon, galluogwyd ef trwy haelioni ei noddwr, Syr Watkin Williams-Wynn, i fyned i'r Eidal yn 1770. Dychwelodd i Brydain yn 1775, ac yn 1776 etholwyd ef yn A.R.A. Portreadau lled fychan eu maint oedd mwyafrif ei ddarluniau, ac yn ystod y blynyddoedd o 1776 i 1788 derbyniwyd 22 ohonynt ar gyfer arddangosfeydd yr Academi Frenhinol. Bu f. gwraig Parry, merch y pensaer Henry Keene, yn 1779, a threuliodd ef lawer o'i amser ar ôl hynny yn Rhufain. Dychwelodd i Gymru yn gynnar yn 1791, a bu f. 13 Chwefror yr un flwyddyn.
Llyfryddiaeth:
- D.N.B.;
- Graves, R.A., vi, 63.
Awdur:
Miss Megan Ellis, (1906-2001), Aberystwyth
