POWELL, Syr, JOHN (1633-1696), barnwr

Mab John Powell, Pentre Meurig, Llanwrda, Sir Gaerfyrddin. Cafodd ei addysg pan oedd yn llanc o dan Jeremy Taylor. Y mae'n debyg mai efe ydoedd y John Powell a ymaelododd yn Rhydychen (Coleg Iesu) yn 1650, ac a gymerth ei B.A. yn 1653 ac M.A. yn 1654. Aeth i Gray's Inn yn 1650. O 1683 hyd 1690 yr oedd yn gofiadur Aberhonddu ac o 1685 hyd 1686 yn is-farnwr cylchdaith Aberhonddu. Cafodd ei ddyrchafu'n farchog yn 1686 a'i ddewis yn farnwr llys y 'Common Pleas'; symudwyd ef i lys Mainc y Brenin yn 1687. Ym mis Mehefin 1688 yr oedd yn aelod o'r llys a farnodd y 'Saith Esgob' yn ddieuog a chymerwyd ei swydd fel barnwr oddi arno; cafodd ei swydd yn ôl y flwyddyn ddilynol. Bu farw 7 Medi 1696 a chladdwyd ef yn eglwys blwyf Lacharn.

Cymysgwyd Syr John Powell â Syr John Powell (1645 - 1713), Caerloyw; gweler D.N.B.

Bu ei fab THOMAS POWELL (1664 - 1720), Broadway, Sir Gaerfyrddin, a Coldbrook, sir Fynwy, yn atwrnai-cyffredinol cylchdaith Caerfyrddin, 1695-1715, yn aelod seneddol Mynwy, 1705-8, a sir Gaerfyrddin, 1710-15. Crewyd ef yn farwnig yn 1698, eithr daeth y teitl i'w derfyn pan fu ei fab Syr HERBERT POWELL farw yn 1721.

Awdur

• Yr Athro Glyn Roberts, (1904 - 1962)

Ffynonellau

• Oxford Dictionary of National Biography
• William Spurrell, Carmarthen and its neighbourhood (Carmarthen 1860), 84-6
• Transactions of the Carmarthenshire Antiquarian Society and Field Club, xvii, 29-30
• Richard Fenton, Tours in Wales 1804-1813 (1917), 69
• W. R. Williams, The parliamentary history of the principality of Wales, from the earliest times to the present day, 1541-1895 (Brecknock 1895), 46-7
• W. R. Williams, The history of the Great Sessions in Wales, 1542-1830, together with the lives of the Welsh judges (Brecknock 1899), 141

Dolenni Ychwanegol

• Wikidata: Q6253276

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/