Y Bywgraffiadur Cymreig


A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z



THOMAS , PHILIP EDWARD ( 1878 - 1917 ), bardd, traethodwr, a beirniad ;

g. yn Lambeth , Llundain , 3 Mawrth 1878 , mab Philip Henry Thomas , Tredegar , a'i wraig Mary Elizabeth , o Gasnewydd-ar-Wysg . O ran ei dras yr oedd o Forgannwg a Gwent , ac yr oedd y cefndir teuluol yn Gymreig . Cyhoeddwyd ei lyfr cyntaf, The Woodland Life , yn 1897 . Yn 1899 , ac yntau'n fyfyriwr yn Rhydychen , priododd Helen Berenice Noble ; bu iddynt dri o blant. Yr oedd yn feirniad llenyddol nodedig, ac ymysg y beirniaid cyntaf i ganfod gallu W. H. Davies [q.v.] fel bardd . Ymysg ei gyfeillion o Gymry yr oedd W. H. Davies a John Jenkins (‘ Gwili ’) [q.v.] . Datguddir ei gariad dwfn at Gymru yn ei Beautiful Wales , 1905 , ac yma a thraw, ar wasgar, yn ei weithiau eraill. Ysgrifennodd lawer o lyfrau mewn rhyddiaith gain a detholedig, eithr ni welwyd mo'i werth yn gyfan gwbl hyd nes y cyhoeddwyd, ar ôl ei farw, y caneuon a ysgrifennodd yn ei flynyddoedd diwethaf. Lladdwyd ef ar faes y frwydr , 9 Ebrill 1917 . Heblaw y llyfrau a enwyd eisoes dylid ychwanegu: George Borrow , Richard Jefferies , Collected Poems , The Childhood of Edward Thomas , The Prose of Edward Thomas (a ddetholwyd gan Roland Gant ).

Ffynonellau:

  • Helen Thomas , As it Was, a World without End (Llundain, 1935) ;
  • R. P. Eckert , Edward Thomas a biography and a bibliography (Llundain, 1937) ;
  • John Moore , The Life and Letters of Edward Thomas (Llundain, 1939) ;
  • James Guthrie , To the Memory of Edward Thomas (Bognor Regis, 1937) ;
  • erthyglau yn The Welsh Review , Medi 1945 a'r haf 1948 ;
  • E. Cefni Jones , Britannica (Llandysul, 1937) .

Awdur:

Lawrence William Hockey, M.A., Casnewydd

Blwyddyn Cyhoeddi: 1953-54