WATCYN CLYWEDOG (fl., c. 1630-50), bardd;
Ceir tua 50 o'i gywyddau mewn llawysgrif yn ogystal â llawer o englynion. Estynnai ei gylch clera dros siroedd Môn, Caernarfon, a Dinbych, ac yr oedd iddo nawdd yn y Berth Ddu, Bodfel, Bodwrdda, Hendre Fawr, Llannor, Llwydiarth, Plas-y-ward, a Saethon. Y mae dros hanner ei waith yn gywyddau marwnad, a chanwyd un o'r rhain i'r cyrnol Richard Bulkeley a laddwyd mewn ymryson cleddyfau ar draeth y Lafan, 19 Chwefror 1649/50. Canodd hefyd i dŷ newydd Dr. John Davies, Mallwyd [q.v.] yn 1630. Dengys ei gywyddau mawl, marwnad, gofyn, cymod, cyngor, a phriodas, fel y ffynnai'r traddodiad nawdd o hyd yn yr ardaloedd hyn.
Llyfryddiaeth:
- Pen. MSS. 144, 151;
- Mostyn MSS. 112, 165;
- Cwrtmawr MS. 21;
- Brogyntyn MS. 4;
- Nantglyn MSS. 2, 3;
- ‘Y Piser Hir’;
- N.L.W. MSS. 279, 431, 434, 5269, 5272, 6499, 8330;
- J. E. Griffith, P.A.C.F.;
- J. Fisher, Cefn Coch MSS.
Awdur:
Yr Athro David James Bowen, M.A., Aberystwyth
