WILLIAMS, RICHARD (1802 - 1842), gweinidog gyda'r Methodistiaid Calfinaidd ac awdur

Ganwyd yn y Winllan, Llanbrynmair, 31 Ionawr 1802, mab Richard a Mary Williams, a brawd William Williams ('Gwilym Cyfeiliog'). Addysgwyd ef yn ysgol ei ewythr, y Parch. John Roberts, ac yn ysgol William Owen, Trallwng, yn ddiweddarach bu mewn ysgolion yn Birmingham, Wrecsam, a Lerpwl; ac yno, ar ôl ysbaid, yr agorodd ysgol ei hunan. Yn 1830 priododd â Mary, merch y Parch. Thomas Hughes, Lerpwl. Yn 1834 ymryddhaodd o waith ysgol er mwyn pregethu gyda'r Methodistiaid Calfinaidd. Fe'i hordeiniwyd yn 1835 yn y Bala a threuliodd weddill ei oes yn weinidog ar eglwys Rose Place, Mulberry Street, Lerpwl. Yr oedd yn un o sylfaenwyr Cymdeithas Genedlaethol Dramor y Methodistiaid Calfinaidd, ac fel cadeirydd cyntaf y pwyllgor fe'i dewiswyd i roddi y mater gerbron y ddwy gymdeithasfa yn Llanfaircaereinion ac yng Nghastell Nedd yn 1840. Cydolygodd, gyda'r Parch. Joseph Williams, gasgliad o emynau yn 1841. Ysgrifennodd Y Pregethwr a'r Gwrandawr, 1840, ymddiddanion a gyhoeddwyd yn y Drysorfa, 1838/9, ac erthyglau eraill, a'r emyn ' Er fod i'm rhan tra ar y llawr.' Bu farw 30 Awst 1842 yn Lerpwl.

Awdur

• William Emyr Williams, (1889 - 1958)

Ffynonellau

• Llythyrau teuluol
• John Roberts ('J.R.'), yn Y Dysgedydd, 1839
• Hughes, Methodistiaeth Cymru (1851–6), iii, 410
• Y Cenhadwr, Ionawr 1940
• Y Drysorfa, Chwefror 1879
• Owen Thomas, Cofiant y Parchedig John Jones, Talsarn: mewn cysylltiad a hanes duwinyddiaeth a phregethu Cymru (Wrexham 1874), 532-6

Dolenni Ychwanegol

• VIAF: 106834785
• Wikidata: Q20804754

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/