Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

WILLIAMS , FOULK ROBERT (‘ Eos Llyfnwy ’; 1774 - 1870 ); g. yn Hendreforionbach , Llanllyfni , sir Gaernarfon , 1774 . A ganlyn ydyw cofrestriad ei fedydd; ‘ 10 ber -6 the Foulk ye son of Robt Wm of Hendreforion bach weaver by Lowry his wife.’ Adwaenid ef ar hyd ei oes dan yr enw Foulk Roberts , ac oherwydd ei ddawn arbennig i ganu gelwid ef yn ‘ Ffowc Bach y Canwr .’ Yn 17 oed talodd bonheddwr am dri mis o addysg gerddorol iddo gan John Williams (‘ Ioan Rhagfyr ’) [q.v.] , Dolgellau . Daeth yn gerddor lled dda, ac am lawer o flynyddoedd âi o gwmpas ardaloedd Arfon a Môn i ddysgu'r cantorion ganu . Yn Llyfrgell Genedlaethol Cymru ceir llyfr wedi ei ysgrifennu ganddo. Ar yr wyneb-ddalen y mae — ‘ Llyfr Cerddoriaeth o Gerddi Sion a gwir folianwyr yr Arglwydd. Casgliad o Anthemau, Hymn Tonau, Carolau a hen alawon, a ysgrifennwyd tua 1834 gan Foulk Roberts “Eos Llyfnwy” Llanrug, sir Gaernarfon .’ Mae 1,158 o dudalennau i'r llyfr, a channoedd o donau ac anthemau o waith prif gerddorion y cyfnod. Wedi priodi symudodd Foulk Roberts i fyw i'r Clegir yng nghwr uchaf plwyf Llanrug , ac yno y bu f. 11 Rhagfyr 1870 . Claddwyd ef ym mynwent Llanrug .

Llyfryddiaeth:

M. O. Jones , Bywgraffiaeth Cerddorion Cymreig . Cymdeithas yr Eisteddfod Genedlaethol, 1890 ;

Awdur:

Robert David Griffith, M.A., (1877-1958), Hen Golwyn.

Atodiadau a chywiriadau:

ROBERTS , FOULK (‘ Eos Llyfnwy ’; Bywg. , 976, o dan WILLIAMS , FOULK ROBERT ) Bedyddiwyd ef yn Llanllyfni , 6 Rhag. 1782 ; claddwyd brawd hŷn o'r un enw ar 16 Gorff. 1780 . Pr. ei gyfnither, Catherine Williams , yn Llanberis , 6 Awst 1800 .

Llyfryddiaeth:

Gwybodaeth gan Huw Roberts, Pwllheli .