WILLIAMS, DANIEL THOMAS ('Tydfylyn'; 1820 - 1876), gweinidog gyda'r Annibynwyr, bardd a cherddor

Ganwyd 20 Hydref 1820 ym Merthyr Tydfil. Cychwynnodd ei yrfa fel groser, eithr bu raid iddo roi hynny heibio o achos afiechyd, ac yn fuan wedyn dechreuodd bregethu gyda'r Annibynwyr. Ordeiniwyd ef 18 Gorffennaf 1870 yn weinidog capel Annibynnol Adulam, Merthyr. Cystadlai mewn eisteddfodau, ac ef ydoedd bardd cadeiriol eisteddfod Ystrad, 1870. Yr oedd hefyd yn feirniad eisteddfodol. Cyhoeddodd gyfrolau o gerddoriaeth a barddoniaeth, megis Y Canor Dirwestol, 1845; cyfansoddiadau cerddorol gwobrwyedig 1849; Pennillion Arobryn Eisteddfod y Cymmrodorion Dirwestol, Merthyr, 1854, 1855 (gol.); Cathlau Byrion, 1864; darlith ac awdl ar 'Y Mor,' 1868. Ysgrifennodd y geiriau Cymraeg i 'Yr Ehedydd' a'r geiriau Saesneg i 'Rhyfelgan y Myncod' a 'Cydgan y Bradwyr,' cyfansoddiadau cerddorol gan Joseph Parry. Bu farw 2 Mai 1876.

Awdur

• Yr Athro David James Bowen

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• The Congregational Year Book, 1877
• Catalogue of Printed Literature in the Welsh Department, Cardiff Free Libraries (1898)
• NLW MSS 584, 1808, 1895, 2238, 2241
• M. O. Jones, Bywgraffiaeth Cerddorion Cymreig (1890)

Darllen Pellach

• Thomas Williams, Pryddest goffadwriaethol i'r diweddar Rosser Beynon, (Asaph Glan Taf) a'r Parch. D. T. Williams (Tydfylyn)... buddugol yn Eisteddfod Cymrodorion dirwestol Merthyr, Nadolig, 1876 (Merthyr Tydfil 1877)

Dolenni Ychwanegol

• Wikidata: Q28361711

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/