EDWIN (bu farw 1073), arglwydd Tegeingl

(h.y. cymydau Rhuddlan, Coleshill, a Prestatyn), a 'sylfaenydd' un o 'Bymtheg Llwyth Gwynedd.' Bu Tegeingl yn rhan o frenhiniaeth Seisnig Mercia am dros dair canrif, h.y. nes ailgoncweriwyd hi gan Ddafydd ab Owain Gwynedd yn y 12fed ganrif. Mewn rhai achau dywedir fod Edwin yn or-or-wyr i Hywel Dda ac mai Ethelfleda, merch Edwin, brenin Mercia, oedd ei fam. Priododd Iwerydd, chwaer Bleddyn ap Cynfyn, a daeth yn dad Owain, Uchdryd, a Hywel.

Yr oedd llawer o hen deuluoedd tiriog Gogledd Cymru (yn enwedig yn siroedd y Fflint a Dinbych) yn hawlio disgyn o Edwin neu ei feibion - Mostyniaid Mostyn a Talacre yn eu plith; yr oedd Dr. David Powel, Rhiwabon, hefyd yn hawlio ei fod yn disgyn o Uchdryd.

Awdur

• Syr William Llewelyn Davies, (1887 - 1952)

Ffynonellau

• J. E. Lloyd, A History of Wales from the Earliest Times to the Edwardian Conquest (London 1911), Cyf. I
• J. E. Lloyd, A History of Wales from the Earliest Times to the Edwardian Conquest (London 1911), Cyf. II
• Philip Yorke, The Royal Tribes of Wales (arg. 1887)

Dolenni Ychwanegol

• Wikidata: Q5346938

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/