JONES, PHILIP (1855 - 1945), gweinidog gyda'r Methodistiaid Calfinaidd

Ganwyd yn 30 Cotton Row, Tai-bach, Morgannwg, 19 Chwefror 1855, mab Evan a Catherine Jones. Codwyd ef yn eglwys y Dyffryn lle clywodd hen gewri'r pulpud ym Morgannwg. Addysgwyd ef yn Nhrefeca, ac fe'i hordeiniwyd yn sasiwn Aberystwyth, 1887. Bu'n weinidog yn Abergwaun; Llandeilo Fawr (am ddau dymor), Capel Newydd, Llanelli; a Phenuel, Pont-y-pridd. Treuliodd ei flynyddoedd olaf ym Mhorth-cawl, a bu farw 24 Medi 1945. Pregethwr ydoedd yn anad dim, yn olyniaeth hen bregethwyr Morgannwg. Yr oedd yn llithrig ei barabl, yn ddramatig ei arddull, ac yn chwim ei feddwl. Yr oedd hen eirfa tafodiaith Morgannwg yn fyw ar ei fin, a dotiai'r werin arno. Pregethodd lawer ym mhrif wyliau ei Gyfundeb am gyfnod maith, ac edrychid arno fel yr olaf o farwniaid y pulpud Methodistaidd yn y de. Cyhoeddwyd cyfrol fechan o'i bregethau, ynghyd â rhai emynau, yn 1948.

Awdur

• Y Parchedig Gomer Morgan Roberts, (1904 - 1993)

Ffynonellau

• Blwyddiadur y Methodistiaid Calfinaidd, 1946, 173
• W. Nantlais Williams (gol.), Pregethau ac Emynau (Llandybïe 1948)

Dolenni Ychwanegol

• Wikidata: Q20748867

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/