MACHEN, ARTHUR (1863 - 1947) a gyfenwyd yn ARTHUR LLEWELLIN JONES i gychwyn, awdur

Ganwyd 3 Mawrth 1863. Treuliodd flynyddoedd ei ieuenctid yn rheithordy Llanddewi Fach yn ymyl Caerlleon-ar-Wysg a bu yn ysgol eglwys gadeiriol Henffordd hyd nes oedd yn 17 oed. Wedi treulio peth amser yn Llundain, bron a llewygu, daeth i feddu incwm annibynnol am gyfnod a chyhoeddi rhai o'i ystorïau cynnar gorau.

Yr oedd eisoes wedi ysgrifennu cyfieithiad o waith Casanova a dau waith efelychiadol - The Anatomy of Tobacco, 1888, a The Chronicle of Clemendy, 1884. Yn 1900 yr oedd yn aelod o gwmni drama crwydrol F. R. Benson. Wedi hynny bu'n ysgrifennu i newyddiaduron; cyhoeddwyd dau o'i weithiau mwyaf adnabyddus yn y newyddiadur yr ysgrifennai iddo. The Bowman, a gyhoeddwyd yn yr Evening News, 29 Medi 1914, a roes gychwyn i stori ' Angel Mons ' yn ystod Rhyfel 1914-18. Cyhoeddwyd ei waith hunan-gofiannol cyntaf, Far Off Things (1923), o dan deitl arall yn yr Evening News yn 1915; cynhwysai'r gwaith hwn atgofion pleserus wedi eu hysgrifennu mewn ysbryd aeddfed a phrofiadol.

Erbyn heddiw daeth yr awdur yn enwog am ei storïau am y byd arall sydd yn ymylu ar fywyd realiti; ofn a dychryn ydyw'r cyweirnod iddynt; yn Hieroglyphics, The Hill of Dreams, a The Children of the Pool y ceir yr esiamplau mwyaf adnabyddus (gweler rhestr yn Who's Who). Er ei dueddiadau Catholig ni thorrodd ei gysylltiad â'r Eglwys Anglicanaidd.

Priododd ddwywaith a bu iddo fab a merch o'r ail wraig. Ymneilltuodd i Amersham yn 1929 a daeth yn enwog fel ymgomiwr mewn cwmni. Cafodd bensiwn sifil y Llywodraeth yn 1932. Bu farw 15 Rhagfyr 1947.

Awdur

• Cecil John Layton Price, (1915 - 1991)

Ffynonellau

• The Times, 16 Rhagfyr 1947
• gwybodaeth gan Leslie Miller
• D. P. M. Michael, Arthur Machen (Caerdydd 1971)
• Meic Stephens (gol), The New Companion to the Literature of Wales (Cardiff 1998)

Darllen Pellach

• Archifau LlGC: The Chain Papers: C 2/14/12: taflen "Luncheon... in honour of a man of Gwent, Arthur Machen"
• Erthygl Wicipedia: Arthur Machen

Delweddau

• LlGC: Arthur Machen in the garden, Lynwood, Amershaw, July 1930
• LlGC: Photograph of Arthur Machen when with the Benson Company
• LlGC: Mr & Mrs Arthur Machen on Turville Heath, Bucks where A.M. lived in 1893

Gweithiau

• Arthur Machen, The great god Pan and The inmost light (London 1894)

Dolenni Ychwanegol

• VIAF: 2473758
• Wikidata: Q540166

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/