LLOYD, WILLIAM (1786 - 1852), cerddor

Ganwyd yn Rhos-goch, Llaniestyn, Llŷn, yn 1786; dywed traddodiad iddo fod yn borthmon. Yr oedd y teulu'n gerddorol, ac âi Lloyd ei hun o amgylch Llŷn gan gynnal dosbarthiadau cerdd ac arwain cymanfaoedd; hefyd rhoddai hyfforddiant i bobl a ymwelai ag ef yn ei gartref. Cyfansoddodd lawer o emyndonau, ond y dôn y cysylltir ef â hi amlaf yw'r dôn urddasol honno a adwaenir heddiw fel ' Meirionydd '. Ymddengys hon nid yn unig ym mhob llyfr emynau Cymraeg, ond hefyd mewn casgliadau fel Songs of Praise. Mewn llawysgrif a berthynai i Lloyd ei hun gelwir hi yn ' Berth ', ac o dan yr enw hwn yr ymddangosodd gyntaf mewn print, yn Caniadaeth Seion (1840) a gyhoeddwyd gan Richard Mills. Yn ôl ei garreg fedd ym mynwent eglwys Llaniestyn bu farw 7 Mehefin 1852, yn 66 oed.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• J. Jones ('Myrddin Fardd'), Enwogion Sir Gaernarfon (1922), 253
• P. Dearmer ac A. Jacob, Songs of Praise Discussed a handbook to the best-known hymns and to others recently introduced (Llundain 1933)
• Ifor L. Evans (gol.), Mawl yr Oesoedd. Casgliad o donau ac emynau (Caerdydd 1951)

Darllen Pellach

• Erthygl Wicipedia: William Lloyd (cerddor)

Dolenni Ychwanegol

• Wikidata: Q20821242

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/