HUGHES, JOHN EDWARD (1879 - 1959), gweinidog (MC) ac awdur

Ganwyd 8 Mehefin 1879 yn y Gronglwyd, Cerrigydrudion, Sir Ddinbych, mab John a Jane Hughes. Addysgwyd ef yn ysgol y pentref, ysgol ramadeg y Bala, Coleg y Brifysgol, Aberystwyth (lle graddiodd yn y celfyddydau), a Choleg Diwinyddol y Bala (lle graddiodd mewn diwinyddiaeth). Ei gydletywr yn Aberystwyth oedd ei gyfyrder, R.T. Jenkins - wedi hynny ei gyd-frawd-yng-nghyfraith. Dechreuasai bregethu yn 1899, ac ordeiniwyd ef yn 1907. Bu'n gweinidogaethu yn Engedi, Ffestiniog (1906-12), ac yn Horeb, Brynsiencyn a Phreswylfa, Llanddaniel, Môn (1913). Priododd (1), 1907, Ada Davies, Aberystwyth, a fu farw ymhen ychydig flynyddoedd; priododd (2), 1920, Mary Jones o Borth Amlwch; ganwyd un mab o'r briodas gyntaf, a thri mab o'r ail briodas. Bu farw 10 Ebrill 1959 yn ysbyty Anfield, Lerpwl, a chladdwyd ei weddillion ym mynwent Llanidan.

Yr oedd J.E. Hughes yn ddiwinydd go graff. Ei ysgrifau ar ' Berson Crist ' yn Y Traethodydd a dynnodd sylw'r Dr. John Williams, Brynsiencyn, ato ac ef a anogodd eglwys Brynsiencyn i roi galwad iddo. Yn ogystal ag ysgrifennu i'r Traethodydd, Y Drysorfa, a'r Goleuad, cyhoeddodd esboniad ar Efengyl Mathew yn ddwy gyfrol (1937-38). Golygodd hefyd Hanes dechreuad a chynnydd Methodistiaeth ym Mrynsiencyn (1924). Yr oedd yn bregethwr praff a sylweddol. Ymroes i wasanaethu'i Gyfundeb mewn llawer cylch, a bu'n llywydd Sasiwn y Gogledd yn 1957.

Awdur

• Y Parchedig Gomer Morgan Roberts, (1904 - 1993)

Ffynonellau

• H. Ellis, Hanes Methodistiaeth Gorllewin Meirionydd (1891, 1899, 1928), 3 (1928), 93 a 97
• R. T. Jenkins, Edrych yn ôl (Llundain 1968) (1968), 15
• Y Goleuad, 15, 22 a 29 Ebrill 1959
• Blwyddiadur y Methodistiaid Calfinaidd, 1960, 267-8
• H. Ll. Williams (gol.), Braslun o Hanes Methodistiaeth Galfinaidd Môn 1935–70 (1977) (1977), 224-6
• gwybodaeth gan ei fab, Medwyn Hughes, Llandegfan

Dolenni Ychwanegol

• VIAF: 39171565
• Wikidata: Q20804717

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/