Gwasanaethodd ar nifer helaeth o bwyllgorau diwydiannol a chyfansoddiadol, gan amlygu doethineb, dealltwriaeth ac egni anghyffredin. Ef oedd cadeirydd y Pwyllgor Ymgynghorol ar Broblemau Adfer (Reconstruction) yng Nghymru, 1942-46, a bu'n aelod o'r comisiwn ar Ddiwygio'r Cyfansoddiad yn Ceylon, 1944-45. Gwasanaethodd ar Gomisiwn Ffiniau Llywodraeth Leol, 1946-49. Derbyniodd LL.D. er anrh. gan Brifysgolion Cymru, Birmingham a Chaeredin, a'i urddo'n farchog yn 1945 pan oedd yn Ceylon. Bu'n siryf ei sir enedigol yn 1955 ac yn llywydd Cymd. Hynafiaethau Cymru, 1956-57.

Yr oedd yn awdur nifer o gyfrolau megis A social and industrial history of England, 1815-1918 (1920), A short fiscal and financial history of England, 1815-1918 (1921), Studies in Welsh history (1947); The story of Milford (1954), The problem of Wales and other essays (1963); a golygodd A survey of economic development with special reference to Great Britain (1933), a The Cardiff region: a survey (1960). Ceir erthyglau ganddo mewn cyfnodolion cymdeithasau hanes, gwyddoniaduron, Cambridge history of the British Empire a'r Bywgraffiadur Cymreig hyd 1940. Cyhoeddwyd amryw o'i anerchiadau, yn eu plith The dominion of Ceylon (1949) a darlith flynyddol y B.B.C. yng Nghymru a draddododd ar Welsh nationality and historians (1951).

Pr. yn 1913 â Dora Rose Lucile, merch Gethin Davies, prifathro Coleg y Bedyddwyr, Caerdydd, a bu iddynt un mab. Bu f. 7 Ion. 1967 yn ei gartref yn 11 Celyn Grove, Cyncoed, Caerdydd.