THOMAS, STAFFORD HENRY MORGAN (1896 - 1968), gweinidog (MC) a bardd

Ganwyd ef yn Glenview, Melin Ifan Ddu, Morgannwg, 13 Gorffennaf 1896, mab Morgan a Margaret Thomas. Symudodd ei rieni i Borthmadog, ac yno - yn y Tabernacl - y dechreuodd bregethu. Bu yng ngharchar yn ystod Rhyfel Byd I fel gwrthwynebwr cydwybodol. Addysgwyd ef yn ysgol ramadeg y Porth, Coleg y Brifysgol, Caerdydd (lle graddiodd), a Choleg y Bala. Ordeiniwyd ef yn 1923, a bu'n gweinidogaethu ym Melingryddan, Castell-nedd (1923-26); Nasareth, Aberdâr (1926-27); Holywell a Bagillt (1927-32); Maenan, Penmaen-mawr (1932-65, a'r Gatws, Bangor, 1956-65). Priododd Blodwen Griffith, Llanfair Talhaearn ym 1926, a bu iddynt un ferch. Bu farw 6 Rhagfyr 1968.

Cyfrannodd lawer, mewn rhyddiaith a barddoniaeth, i'r Goleuad a'r Drysorfa. Cafodd wobrwyon yn yr Eisteddfod Genedlaethol am gerddi coffa i T. Gwynn Jones (1950) a Prosser Rhys (1952), ac am gywydd, ' Morgannwg ', yn 1956.

Awdur

• Y Parchedig Gomer Morgan Roberts, (1904 - 1993)

Ffynonellau

• Who's who in the Free Churches? (1951), 355
• Y Goleuad, 11 Rhagfyr 1968 a 29 Ionawr 1969
• Blwyddiadur y Methodistiaid Calfinaidd, 289-90
• gwybodaeth gan ei ferch, Beryl S. Williams, Bangor

Dolenni Ychwanegol

• Wikidata: Q20821142

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/